Psa 24 | WSK | STEP | Ali imi, se mel suen biya awete aniso, mu Kaem ko la. Ali imi lilim la, se kariimet suen la te anisan, mu Kaem ko la.

Psalms 24

Kaem nu King Biya ko den

(Devit ko wur bo)

1 Ali imi, se mel suen biya awete aniso, mu Kaem ko la.

Ali imi lilim la, se kariimet suen la te anisan, mu Kaem ko la.

2 Nu yu gagi nungam asele balam se yu nama kuwim suwanta bolala awuman, se ali sor aratam.

3 Se awiri ta duruk Saion te nama tarigiruk?

ale Kaem ko kuwim kako nunguning mu ningi kasu nagurok?

4 Mu awiriya nu ko kuting karur mena, gomang karur mena, se kaem kawel me nunup patawukaso, ale saki alo den kawel te me nunga kulukurukaso, kari borta Kaem kote bagurukko.

5 Se Kaem kari mutang kari diram ma baluk,

ale sanguk, ale marak sokel yawara tuokko.

6 Kari uwutata musele Kaem kote pingi namomonko terong maman, ale Jekop ko Kaem nup patawomonko terong maman.

7 Wonong ko kar ko songkorang kaogal,

ko songkorang girakala kaloman bare kagaru ulal awural,

se King Biya kasu nagurokko!

8 Se King Biya mu awiri ya?

Mu Kaem sokel ago nunguning, nu tom suen biya kager te sokel ago bagoso ware borta King Biya.

9 Se songkorang kagaru ulal awural,

songkorang girakala kaloman bare kagaru ulal awural,

se King Biya kasu nagurokko!

10 Se King Biya mu awiri ya?

Mu Kaem sokel ago nunguning mutang King Biya.